နန်းမယ်ခုံမြို့၏ဒေသဆိုင်ရာအချက်အလက်များ

အခန်း(၁)

နိဒါန်းနှင့်ဒေသသမိုင်း


နိဒါန်း

၁။အထွေထွေအုပ်ချုပ်ရေးဦးစီးဌာနသည် ပြည်ထောင်စုအစိုးရအဖွဲ့ရုံး ဝန်ကြီးဌာနအောက်ရှိ ဌာနတစ်ခုဖြစ်ပြီး တရားဥပဒေစိုးမိုးရေး၊ရပ်ရွာအေးချမ်း သာယာရေး၊ ဒေသဖွံ့ဖြိုးရေးနှင့်ပြည်သူ့အကျိုးပြု ဆောင်ရွက်ရေးဟူသော ရည်မှန်းချက်တာဝန်များကိုအောင်မြင်အောင် ဆောင်ရွက် လျက်ရှိပါသည်။ အထွေထွေအုပ်ချုပ်ရေးဦးစီးဌာနတွင် တာဝန်ထမ်းဆောင်ကြသည့် အဆင့် ဆင့်သောအရာထမ်း၊ အမှုထမ်းများသည် ရုံးချုပ်အဆင့်မှ အောက်ခြေ ရပ်ကွက်/ကျေးရွာအုပ်စုအဆင့်အထိ အထွေထွေအုပ်ချုပ်ရေးဦးစီးဌာနရုံး အသီးသီးတွင် တာဝန်ထမ်းဆောင်ကြရပြီးနိုင်ငံတော်အုပ်ချုပ်ရေးယန္တရား ချောမွေ့စွာလည်ပတ်ရေးတွင် ပါဝင်ဆောင်ရွက်ခြင်း၊ ဝန်ကြီးဌာန၏ ရည်မှန်း ချက်တာဝန်များ၊အခြားဝန်ကြီးဌာနမှ ပေးအပ်သောတာဝန်များနှင့် ဒေသဆိုင်ရာ အစိုးရအဖွဲ့များမှပေးအပ်သော လုပ်ငန်းတာဝန်များကို ကျေပွန်စွာ ထမ်းဆောင်နေကြရသည်ဖြစ်ရာ ဒေသဆိုင်ရာအချက်အလက်များပြုစု ထားရှိခြင်းသည်များစွာအရေးပါလာပါသည်။ ဒေသဆိုင်ရာအချက်အလက်များ ပြုစုခြင်းဖြင့်မိမိတို့၏ လုပ်ငန်းဆောင်ရွက်ရာတွင်အထောက်အကူပြုသကဲ့သို့ အကြီးအကဲများနယ်မြေသို့ ကွင်းဆင်းရာတွင် နယ်မြေ၏အချက်အလက်များကို လွယ်ကူစွာသိရှိနိုင်မည်ဖြစ်ပါသည်။ ဤစာအုပ်သည်နန်းမယ်ခုံမြို့၏ ဒေသဆိုင်ရာ အချက်အလက်များ(၂၀၁၈ခုနှစ်၊အောက်တိုဘာလမှ၂၀၁၉ခုနှစ်၊ စက်တင်ဘာလ အထိ)ကို သက်ဆိုင်ရာဌာနအသီးသီးမှ ပေးပို့သော ကိန်းဂဏန်းများနှင့်အညီ ပြုစုတင်ပြထားခြင်းဖြစ်ပါသည်။


ဒေသသမိုင်းအကျဉ်း

၂။ ဒီးမော့ဆိုမြို့နယ်သည် ပြည်ထဲရေးဝန်ကြီးဌာန၏ (၂၇-၇-၁၉၇၂) ရက်စွဲပါရုံးအမိန့်စာအမှတ် ၁၀၃/၅၀/စိတ်(၁)ဖြင့် မြို့အင်္ဂါရပ်နှင့် ညီညွတ် သော နန်းမယ်ခုံကျေးရွာအုပ်စုအား ရပ်ကွက်(၄)ရပ်ကွက် ပါဝင်သော နန်းမယ်ခုံမြို့အဖြစ် ပြည်ထဲရေးဝန်ကြီးဌာန၏ (၂၆.၁၀.၂၀၁၇)ရက်စွဲပါ အမိန့်စာအမှတ်(၁၃၈၇/၂၀၁၇)ဖြင့် ဖွဲ့စည်းခဲ့ပါသည်။

အခန်း(၂)

ပထဝီဝင်အနေအထား


တည်နေရာအကျယ်အဝန်း

၃။ နန်းမယ်ခုံမြို့သည် မြန်မာနိုင်ငံ၏ အရှေ့ဘက်ပိုင်းတွင်ရှိ၍ ကယား ပြည်နယ်၊ လွိုင်ကော်ခရိုင်၊ ဒီးမော့ဆိုမြို့နယ်တွင် တည်ရှိပါသည်။ နန်းမယ်ခုံမြို့သည် ‌မြောက်လတ္တီတွဒ် ၁၉ ဒီဂရီ ၄၀မိနစ် ၃၈.၅၂စက္ကန့်နှင့် ၁၉ဒီဂရီ ၃၉မိနစ် ၄၈.၀၃စက္ကန့်ကြား အရှေ့လောင်ဂျီ တွဒ် ၉၇ဒီဂရီ ၀၆မိနစ် ၂၆.၆၉စက္ကန့် နှင့် ၉၇ဒီဂရီ ၀၆မိနစ် ၃၉.၃၉ စက္ကန့်အကြားတွင် တည်ရှိပါသည်။ အရှေ့မှအနောက်သို့ (၀.၆)မိုင်နှင့် တောင်မှ မြောက်သို့ (၀.၈)မိုင်ရှည်လျားပါသည်။ နန်းမယ်ခုံမြို့၏ ဧရိယာစတုရန်းမိုင်ပေါင်း (၀.၅၆၅)ရှိပါသည်။


နယ်နိမိတ်

၄။ နန်းမယ်ခုံမြို့၏ အရှေ့ဘက်တွင် ဒီးမော့ဆိုမြို့နယ်၊ ဘုရားဖြူ ကျေးရွာအုပ်စု၊ အနောက်ဘက်နှင့်တောင်ဘက်တို့တွင် ဒီးမော့ဆိုမြို့နယ်၊ အိုကေကျေးရွာအုပ်စုနှင့် မြောက်ဘက်တွင် ဆင်တောင်ကျေးရွာအုပ်စုနှင့် နယ်နိမိတ်ထိစပ်လျက်ရှိပါသည်။


မြေမျက်နှာသွင်ပြင်

၅။ နန်းမယ်ခုံမြို့သည် တောင်ကုန်းတောင်တန်း ဝန်းရံလျက်ရှိသော မြေပြန့်ဒေသဖြစ်ပါသည်။


ရေဆင်း

၆။ နန်းမယ်ခုံမြို့အတွင်း နန်းမယ်ခုံချောင်းသည် အနောက်မှ အရှေ့သို့၊ ဆင်တောင်ချောင်းသည် အနောက်မှ အရှေ့သို့ စီးဆင်းလျက်ရှိပါသည်။


ပင်လယ်ရေမျက်နှာပြင်အထက်အမြင့်

၇။ နန်းမယ်ခုံမြို့သည် ပင်လယ်ရေမျက်နှာပြင်အထက်ပျှမ်းမျှအမြင့် (၂၉၁၉)ပေအထက်တွင် တည်ရှိပါသည်။

 

၂၀၁၇ ခုနှစ်၊ ဧပြီလမှ ၂၀၁၈ ခုနှစ်၊ မတ်လအထိ သတင်းအချက်အလက် အပြည့်အစုံဖတ်ရှု့ရန်

၂၀၁၈ ခုနှစ်၊ ဧပြီလမှ ၂၀၁၈ ခုနှစ်၊ စက်တင်ဘာလအထိ သတင်းအချက်အလက် အပြည့်အစုံဖတ်ရှု့ရန်

၂၀၁၈ ခုနှစ် အောက်တိုဘာလမှ ၂၀၁၉ ခုနှစ် စက်တင်ဘာလအထိ သတင်းအချက်အလက်များ အပြည့်အစုံဖတ်ရှု့ရန်