ဘောလခဲမြို့နယ်ဒေသဆိုင်ရာအချက်အလက်များ

အခန်း(၁)

နိဒါန်းနှင့်ဒေသသမိုင်း


နိဒါန်း

၁။ အထွေထွေအုပ်ချုပ်ရေးဦးစီးဌာနသည်ပြည်ထောင်စုအစိုးရ အဖွဲ့ရုံး အောက်ရှိဌာနတစ်ခုဖြစ်ပြီး တရားဥပဒေစိုးမိုးရေး၊ ရပ်ရွာအေးချမ်းသာယာရေး၊ ဒေသဖွံ့ဖြိုးရေးနှင့်ပြည်သူ့အကျိုးပြုဆောင်ရွက်ရေးဟူသောရည်မှန်းချက်တာဝန်များကိုအောင်မြင်အောင် ဆောင်ရွက်လျက်ရှိပါသည်။ အထွေထွေအုပ် ချုပ်ရေးဦးစီးဌာနတွင် တာဝန်ထမ်းဆောင်ကြသည့် အဆင့်ဆင့်သောအရာ ထမ်း၊ အမှုထမ်းများသည် ရုံးချုပ်အဆင့်မှ အောက်ခြေရပ်ကွက်/ ကျေးရွာအုပ်စု အဆင့်အထိ အထွေထွေအုပ်ချုပ်ရေး ဦးစီးဌာနရုံးအသီးသီးတွင် တာဝန်ထမ်း ဆောင်ကြရပြီးနိုင်ငံတော်အုပ်ချုပ်ရေးယန္တရားချောမွေ့စွာလည်ပတ်ရေးတွင်ပါဝင်ဆောင်ရွက်ခြင်း၊ဝန်ကြီးဌာန၏ရည်မှန်းချက်တာဝန်များ၊အခြားဝန်ကြီးဌာနမှပေးအပ်သောတာဝန်များနှင့် ဒေသဆိုင်ရာအစိုးရအဖွဲ့များမှ ပေးအပ်သော လုပ်ငန်းတာဝန်များကိုကျေပွန်စွာထမ်းဆောင်နေကြရသည်ဖြစ်ရာဒေသဆိုင်ရာ အချက်အလက်များပြုစုထားရှိခြင်းသည်များစွာအရေးပါလာပါသည်။ဒေသဆိုင် ရာအချက်အလက်များ ပြုစုခြင်းဖြင့် မိမိတို့၏လုပ်ငန်း ဆောင်ရွက်ရာတွင် အထောက်အကူပြုသကဲ့သို့ အကြီးအကဲများ နယ်မြေသို့ကွင်းဆင်းရာတွင် နယ်မြေ၏အချက်အလက်များကို လွယ်ကူစွာသိရှိနိုင်မည် ဖြစ်ပါသည်။ ဤစာအုပ်သည် ဘောလခဲမြို့နယ်၏ ဒေသဆိုင်ရာ အချက်အလက်များ (၂၀၁၉ခုနှစ်၊စက်တင်ဘာလအထိအခြေအနေ)ကို သက်ဆိုင်ရာဌာနအသီးသီးမှ ပေးပို့သော ကိန်းဂဏန်းများနှင့်အညီ ပြုစုတင် ပြ ထားခြင်းဖြစ်ပါသည်။။


ဒေသသမိုင်းအကျဉ်း

၂။  ဘောလခဲမြို့ဖြစ်ပေါ်လာပုံမှာ ပဉ္စမသင်္ဂါယနာတင် မင်းတုန်းမင်း လက်ထက်တွင် ဖဘန့်မင်း(ဖိုးဘျား) စောဘွားကြီး အုပ်ချုပ်ခဲ့သော နယ်ပယ်တစ်ခုအဖြစ်တည်ရှိခဲ့သည်။ ဘောလခဲဟူသောစကားမှာ ယင်းတလဲ ဘာသာ စကားအဖြစ်မှည့်ခေါ်သော တဘော့လျာနှင့် တခဲ့လျာ ဟုခေါ်သည့် ချောင်းနှစ် ချောင်းကြားတွင်တည်ရှိပြီး အဆိုပါချောင်းနှစ် ချောင်းကိုပေါင်း ပြီး တဘော့တခဲဟု မှည့်ခေါ်ထားခြင်းဖြစ်ပါသည်။ ကာလရွှေ့လျားလာသော အခါတဘော့တခဲမှ ဘောလခဲဟု မှည့်ခေါ်ခဲ့ပါသည်။ ဘောလခဲမြို့ကို ဟော်နန်းစိုက်ပြီး အုပ်ချုပ်ခဲ့သော ဖဘန့်မင်း လက်ထက်တွင် တိကျသော နယ်နိမိတ်မရှိသော်လည်းနယ်ချဲ့အင်္ဂလိပ်တို့လာရောက်အုပ်ချုပ်ခဲ့သည့်အချိန်မှစ၍နယ်နိမိတ်သတ်မှတ်ခဲ့ပါသည်။ ဘောလခဲစော်ဘွားလက်ထက်တွင် တောင်ပိုင်း ဘောလခဲနှင့် မြောက်ပိုင်း ဘောလခဲဟူ၍ နှစ်ပိုင်းရှိပါသည်။ တောင်ပိုင်းဘောလခဲတွင် ဖားဆောင်း၊ မော်ချီး၊ နန်းဖဲတို့ပါဝင်ပြီး မြောက်ပိုင်း ဘောလခဲတွင် နန်းဖယ်ခုံ၊ ဒေါရောက်ခူ၊ ဆောင်ဒူးနှင့် မုဆိုး ဒေသတို့ပါဝင်ပါ သည်။

(၁၉၆၀)ခုနှစ်တွင် ကယားပြည်နယ်အား စောဖျာဒူးဟုခေါ်သော စော်ဘွားအုပ်ချုပ်နယ်(၃)နယ်မှ မြို့နယ်(၆)မြို့နယ်အထိ တိုးချဲ့ပြင်ဆင် ဖွဲ့စည်းရာတွင် ဘောလခဲနယ်သည် ပျောက်ကွယ်ခဲ့ပါသည်။ ယခင် ဘောလခဲနယ်တွင်ပါဝင်သော တောင်ပိုင်းဘောလခဲနယ်သည် ဖားဆောင်း နယ်မြေအတွင်းသို့လည်းကောင်း၊ မြောက်ပိုင်းဘောလခဲနယ်သည် ဒီးမော့ဆို မြို့နယ်သို့လည်းကောင်း၊ ထည့်သွင်းဖွဲ့စည်းခဲ့ပါသည်။ ပြည်ထဲရေးနှင့် သာသနာရေးဝန်ကြီးဌာန၊ အထွေထွေအုပ်ချုပ်ရေးဦးစီး ဌာန၏( ၁၉၇၂ ) ခုနှစ်၊ ဇူလိုင်လ (၈) ရက်နေ့ ရက်စွဲပါအမိန့်ကြော်ငြာ စာအမှတ်(၂၇၅)ဖြင့် ဘောလခဲမြို့ကို ပြန်လည်ဖွဲ့စည်းခဲ့ပါသည်။


အခန်း(၂)

ပထဝီဝင် အနေအထား


တည်နေရာ နှင့်အကျယ်အဝန်း

၃။ ဘောလခဲမြို့နယ်သည် ‌မြောက်လတ္တီတွဒ် ၁၈ဒီဂရီ ၄၆မိနစ် ၁၉ ဒီဂရီ ၂၀ မိနစ်နှင့်    အရှေ့လောင်ဂျီတွဒ်    ၉၇   ဒီဂရီ   ၁၃   မိနစ်မှ      ၉၇    ဒီဂရီ ၃၀ မိနစ်အတွင်းတည်ရှိပါသည်။ ဘောလခဲမြို့နယ်၏ဧရိယာအကျယ်အဝန်းမှာ အောက်ပါအတိုင်းဖြစ်ပါသည်-

စဉ် မြို့နယ် စတုရန်းမိုင် မြို့ စတုရန်းမိုင်
ဘောလခဲ ၃၅၂.၈၉ ဘောလခဲ ၀.၄၄၈
- - ရွာသစ် ၁.၀၂၀
မြို့နယ်ချုပ် ၃၅၂.၈၉ ၁.၄၆၈

 


နယ်နိမိတ်

၄။ ဘောလခဲမြို့နယ်၏ အရှေ့ဘက်တွင် ရှားတောမြို့နယ်နှင့် မယ်စဲ့မြို့နယ်၊ အနောက်ဘက်တွင်ဖားဆောင်းမြို့နယ်နှင့် ဖရူဆိုမြို့နယ် ၊တောင်ဘက်တွင်မယ်စဲ့မြို့နယ်နှင့်ဖားဆောင်းမြိုနယ်တို့နှင့်ထိစပ်လျက်ရှိပြီးမြောက်ဘက်တွင် လွိုင်ကော်မြို့နယ်၊ ဒီးမော့ဆိုမြို့နယ်နှင့် ရှားတော မြို့နယ်တို့နှင့် နယ်နိမိတ်ထိစပ်လျက်ရှိပါသည်။


မြေမျက်နှာသွင်ပြင်

၅။ မြေမျက်နှာသွင်ပြင်အနေအထားမှာ တောင်ကုန်းတောင်တန်းများ ဝန်းရံနေသော ချိုင့်ဝှမ်းဒေသအဖြစ် တည်ရှိပါသည်။


ရေဆင်း

၆။ ဘောလခဲမြို့နယ်တွင်  မြစ်ချောင်းများနည်းပါးသည့်  ဒေသတစ်ခု ဖြစ်ပြီး မြစ်ချောင်းများသည် မြောက်မှတောင်သို့ စီးဆင်းလျက်ရှိပါသည်။ ထင်ရှားသော ချောင်းမှာ ပွန်ချောင်းဖြစ်ပြီး ဘောလခဲမြို့အနီးမှဖြတ်၍ မြောက်မှတောင်သို့ စီးဆင်းပါသည်။


ပင်လယ်ရေမျက်နှာပြင်အထက်အမြင့်

၇။ ဘောလခဲမြို့နယ်သည် ပင်လယ်ရေမျက်နှာပြင်အထက်  အမြင့်       (၄၅၂)ပေအထက်တွင် တည်ရှိပါသည်။

 

၂၀၁၇ ခုနှစ်၊ ဧပြီလမှ ၂၀၁၈ ခုနှစ်၊ မတ်လအထိ သတင်းအချက်အလက် အပြည့်အစုံဖတ်ရှု့ရန်

၂၀၁၈ ခုနှစ်၊ ဧပြီလမှ ၂၀၁၈ ခုနှစ်၊ စက်တင်ဘာလအထိ သတင်းအချက်အလက် အပြည့်အစုံဖတ်ရှု့ရန်

၂၀၁၈ ခုနှစ် အောက်တိုဘာလမှ ၂၀၁၉ ခုနှစ် စက်တင်ဘာလအထိ သတင်းအချက်အလက်များ အပြည့်အစုံဖတ်ရှု့ရန်