ရှားတောမြို့နယ်၏ဒေသဆိုင်ရာအချက်အလက်များ

အခန်း(၁)

နိဒါန်းနှင့်ဒေသသမိုင်း

နိဒါန်း

၁။ အထွေထွေအုပ်ချုပ်ရေးဦးစီးဌာနသည်ပြည်ထောင်စုအစိုးရအဖွဲ့ရုံး ဝန်ကြီးဌာနအောက်ရှိဌာနတစ်ခုဖြစ်ပြီး တရားဥပဒေစိုးမိုးရေးနှင့်ရပ်ရွာ အေးချမ်းသာယာရေး၊နိုင်ငံတော်အစိုးရ၏ မူဝါဒများအကောင်အထည်ဖော် ရေး၊ ကောင်းမွန်သောအုပ်ချုပ်ရေးစနစ်ဖော်ဆောင်ရေး၊ ပြည်သူဗဟိုပြု ဒေသဖွံ့ဖြိုးရေးလုပ်ငန်းများ ဆောင်ရွက်ရေးဟူသောရည်မှန်းချက်တာဝန် များကိုအောင်မြင်အောင်ဆောင်ရွက်လျက်ရှိပါသည်။ အထွေထွေအုပ်ချုပ် ရေးဦးစီးဌာနတွင်တာဝန်ထမ်းဆောင်ကြသည့် အဆင့်ဆင့်သောအရာထမ်း၊ အမှုထမ်းများသည် ရုံးချုပ်အဆင့်မှအောက် ခြေရပ်ကွက်/ကျေးရွာအုပ်စု အဆင့်အထိ  အထွေထွေအုပ်ချုပ်ရေးဦးစီးဌာနရုံး  အသီးသီးတွင် တာဝန် ထမ်းဆောင်ကြရပြီးနိုင်ငံတော်အုပ်ချုပ်ရေးယန္တရားချောမွေ့စွာ လည်ပတ် ရေးတွင်  ပါဝင်ဆောင်ရွက်ခြင်း၊ ဝန်ကြီးဌာန၏ရည်မှန်းချက် တာဝန်များ၊ အခြားဝန်ကြီးဌာနမှပေးအပ်သောတာဝန်များ နှင့်ဒေသဆိုင်ရာအစိုးရအဖွဲ့ များမှပေးအပ်သော လုပ်ငန်းတာဝန်များကိုကျေပွန်စွာထမ်းဆောင်နေ ကြရသည်ဖြစ်ရာ ဒေသဆိုင်ရာအချက်အလက်များပြုစုထားရှိ ခြင်းသည် များစွာအရေးပါလာပါသည်။ဒေသဆိုင်ရာအချက်အလက်များပြုစုခြင်းဖြင့် မိမိတို့၏ လုပ်ငန်းဆောင်ရွက်ရာတွင် အထောက်အကူပြု သကဲ့သို့ အကြီးအကဲများနယ်မြေသို့ ကွင်းဆင်းရာတွင်နယ်မြေ၏အချက် အလက် များကိုလွယ်ကူစွာသိရှိနိုင်မည်ဖြစ်ပါသည်။ဤစာအုပ်သည်ရှားတောမြို့၏ ဒေသဆိုင်ရာအချက်အလက်များ (၂၀၁၉ခုနှစ် ၊ စက်တင်ဘာလကုန်ထိ အခြေအနေ)ကို သက်ဆိုင်ရာဌာနအသီးသီးမှပေးပို့သော ကိန်းဂဏန်းများ နှင့်အညီ ပြုစုတင်ပြထားခြင်းဖြစ်ပါသည်။


ဒေသသမိုင်းအကျဉ်း

၂။ ရှားတောဒေသသည် တတိယမြန်မာနိုင်ငံကို တည်ထောင်ခဲ့သည့် ကုန်းဘောင်မင်းဆက် အလောင်းမင်းတရားကြီး ဦးအောင်ဇေယျအယုဒ္ဓယျသို့ စစ်ချီ လာသည့်အခါ စစ်လမ်းကြောင်းပေါ်ရှိ စခန်းတစ်ထောက်နားရာဒေသတစ်ခုဖြစ်ခဲ့ သည်ဟုဆိုသည်။ သမိုင်းအထောက်အထားအနေဖြင့် အလယ်ပိုင်းရပ်ကွက်တွင် အလောင်းမင်းတရားကြီးမှ စစ်အောင်နိုင်ရန် ရည်ရွယ်ဆုတောင်းပြီးတည်ထားခဲ့သည့် ဆုတောင်းပြည့်စေတီတစ်ဆူရှိ ပါသည်။ အင်္ဂလိပ်အုပ်စိုးစဉ်ကာလ ၁၈၉၀ ခုနှစ်ခန့်တွင် လူဦးရေနှစ် ထောင်ခန့်နေထိုင်ခဲ့ပြီး ရှမ်းကုန်သည်များဖြစ်ကြောင်း ထိုစဉ်ကဘုန်း တော်ကြီးကျောင်း (၅)ကျောင်းရှိပြီး ရှေးယခင်ကတည်းက ဗုဒ္ဓဘာသာ ထွန်းကားခဲ့သောနေရာတစ်ခုဖြစ်ကြောင်းအများစုမှာကရင်နီခေါ်ကယားလူမျိုးများဖြစ်ကြောင်း လေ့လာသိရှိရပါသည်။ ရှားတောမြို့နယ်ကို ပြည်ထဲရေးနှင့်သာသနာရေး၀န်ကြီးဌာန၊ အထွေထွေအုပ်ချုပ်ရေးဦးစီး ဌာနမှ(၂၂.၇.၁၉၇၂)ရက်စွဲပါ စာအမှတ်၊၁၀၅/၇/စိပ်၁ ဖြင့် အမိန့်ကြော်ငြာစာ ထုတ်ပြန်၍ မြောက်ပိုင်းအုပ်စု၊ တောင်ပိုင်းအုပ်စု ၊ အလယ်ပိုင်းအုပ်စု၊ သံလွင်အရှေ့ခြမ်းအုပ်စုစသည့်အုပ်စု(၄)စုဖြင့်လည်းကောင်း၊ (၁၅.၇.၁၉၇၂) ရက်စွဲပါစာအမှတ်၊ ၁၀၃/၅၂/စိပ်၁ ဖြင့် မေရိယာရပ်ကွက်၊ စျေးပိုင်းရပ်ကွက်၊ တောင်ပိုင်းရပ်ကွက်၊ အလယ်ပိုင်း ရပ်ကွက် စသည့်ရပ်ကွက်(၄)ခုတို့ဖြင့် မြို့အဖြစ်သတ်မှတ်ပေးခဲ့ပါသည်။ ပြည်ထဲရေး၀န်ကြီးဌာန၏ (၇.၆.၂၀၁၀) ရက်စွဲပါစာအမှတ်၊ ၂၀၀/၂၃−၁၉/ဦး၁ဖြင့် ရှားတောမြို့နယ်ကို အောင်ချမ်းသာ ရပ်ကွက် ၊ စျေးပိုင်းရပ်ကွက် ၊ အလယ်ပိုင်းရပ်ကွက်၊ တောင်ပိုင်းရပ်ကွက်၊ မြောက်ပိုင်းကျေးရွာအုပ်စု၊ အလယ်ပိုင်းကျေးရွာအုပ်စု၊ တောင်ပိုင်းကျေးရွာ အုပ်စု တို့ဖြင့်ရပ်ကွက်(၄)ခု၊ ကျေးရွာအုပ်စု(၃)ခု၊ ကျေးရွာ(၂၀)ရွာတို့ဖြင့် ပြောင်းလဲသတ်မှတ်ပေးခဲ့ပါ သည်။

 

အခန်း(၂)

ပထဝီဝင်အနေအထား


တည်နေရာနှင့်အကျယ်အဝန်း

၃။  ရှားတောမြို့နယ်သည် ‌မြောက်လတ္တီတွဒ်၁၉ဒီကရီ၁၀မိနစ်နှင့်၁၉ ဒီကရီ ၃၅မိနစ် အကြား၊ အရှေ့လောင်ဂျီတွဒ် ၉၇ဒီကရီ ၂၇မိနစ်နှင့် ၉၇ဒီကရီ ၅၁မိနစ် အကြား တွင်တည်ရှိပါသည်။ အရှေ့မှအနောက်သို့ ၃၅ မိုင်နှင့် တောင်မှမြောက် သို့ ၅၀မိုင် ရှည်လျားပါသည်။ ရှားတောမြို့နယ်နှင့် မြို့တို့၏ ဧရိယာစတုရန်း မိုင်မှာ အောက် ပါအတိုင်းဖြစ်ပါသည်-

စဉ် မြို့နယ်

မြို့နယ်ဧရိယာ
စတုရန်းမိုင်

မြို့ စတုရန်းမိုင်
ရှားတော ၈၃၄.၁၉ ရှားတော ၀.၂၇
မြို့နယ်ချုပ်   ၈၃၄.၁၉   ၀.၂၇


နယ်နိမိတ်

၄။ ရှားတောမြို့နယ်၏ မြောက်ဘက်တွင်ရှမ်းပြည်နယ်(မောက်မယ်မြို့)၊ အရှေ့ဘက်တွင် ထိုင်းနိုင်ငံ၊ တောင်ဘက်တွင် မယ်စဲ့မြို့နယ်၊ အနောက် ဘက်တွင် ဘောလခဲမြို့နယ်၊ လွိုင်ကော်မြို့နယ်တို့နှင့် နယ်နိမိတ်ထိစပ် လျက်ရှိပါသည်။


မြေမျက်နှာသွင်ပြင်

၅။ ရှားတောမြို့နယ်သည် တောင်များပတ်လည်၀န်းရံလျက်ဒယ်အိုး ပုံသဏ္ဍာန်အနိမ့်ပိုင်းတွင်တည်ရှိပြီး တောင်တန်းများမှာ တစ်ခုနှင့်တစ်ခု ဆက်စပ်လျက်ရှိ ပါသည်။ အရှေ့ဘက်ခြမ်းတွင်သံလွင်မြစ်စီးဆင်းလျက်ရှိ ပါသည်။မြို့နယ်အကျယ်အ၀န်း၏ ငါးပုံသုံးပုံခန့်သည် သံလွင်မြစ်၏ အရှေ့ ဘက်ခြမ်းတွင်တည်ရှိပါသည်။


ရေဆင်း

၆။ ရှားတောမြို့နယ်သည် မြစ်ချောင်းများပေါများသည့်ဒေသတစ်ခု ဖြစ်ပါ သည်။ ထင်ရှားသောမြစ်ချောင်းများမှာပွန်ချောင်း၊ ဖဲဖုလာလဲချောင်း၊ နမ့်မဝမ် ချောင်း၊ သံလွင်မြစ်တို့ဖြစ်ပါသည်။ ၎င်းမြစ်ချောင်းများမှရေကို စိုက်ပျိုးရေ၊ သောက်သုံးရေစသည်ဖြင့်အသုံးပြုပါသည်။ သံလွင်မြစ်မှာ ရာသီမရွေးစက်လှေ များ သွားလာနိုင်ပါသည်။


ပင်လယ်ရေမျက်နှာပြင်အထက်အမြင့်

၇။ ရှားတောမြို့နယ်သည် ပင်လယ်ရေမျက်နှာပြင်အထက် အမြင့်ပေ (၉၃၆) ပေအထက်တွင်တည်ရှိပါသည်။

 

၂၀၁၇ ခုနှစ်၊ ဧပြီလမှ ၂၀၁၈ ခုနှစ်၊ မတ်လအထိ သတင်းအချက်အလက် အပြည့်အစုံဖတ်ရှု့ရန်

၂၀၁၈ ခုနှစ်၊ ဧပြီလမှ ၂၀၁၈ ခုနှစ်၊ စက်တင်ဘာလအထိ သတင်းအချက်အလက် အပြည့်အစုံဖတ်ရှု့ရန်

၂၀၁၈ ခုနှစ် အောက်တိုဘာလမှ ၂၀၁၉ ခုနှစ် စက်တင်ဘာလအထိ သတင်းအချက်အလက်များ အပြည့်အစုံဖတ်ရှု့ရန်