ဖရူဆိုမြို့နယ်ဒေသဆိုင်ရာအချက်အလက်များ

အခန်း(၁)

နိဒါန်းနှင့်ဒေသသမိုင်း


နိဒါန်း

၁။ အထွေထွေအုပ်ချုပ်ရေးဦးစီးဌာနသည်ပြည်ထဲရေးဝန်ကြီးဌာနအောက် ရှိဌာနတစ်ခုဖြစ်ပြီးတရားဥပဒေစိုးမိုးရေး၊ ရပ်ရွာအေးချမ်းသာ ယာရေး၊ ဒေသ ဖွံ့ဖြိုးရေးနှင့် ပြည်သူ့အကျိုးပြုဆောင်ရွက်ရေးဟူသော ရည်မှန်းချက်တာဝန် များကိုအောင်မြင်အောင်ဆောင်ရွက်လျှက်ရှိပါသည်။ အထွေထွအုပ်ချုပ်ရေး ဦးစီးဌာနတွင် တာဝန်ထမ်းဆောင်ကြသည့် အဆင့်ဆင့်သောအရာထမ်း၊ အမှုထမ်းများသည် ရုံးချုပ်အဆင့် မှအောက်ခြေရပ်ကွက်/ ကျေးရွာအုပ်စုအဆင့် အထိအထွေထွေအုပ်ချုပ်ရေး ဦးစီးဌာနရုံးအသီးသီးတွင် တာဝန်ထမ်းဆောင် ကြရပြီး နိုင်ငံတော်အုပ်ချုပ်ရေးယန္တရားချောမွေ့ စွာလည်ပတ်ရေးတွင် ပါဝင် ဆောင်ရွက်ခြင်း၊ ဝန်ကြီးဌာန၏ရည်မှန်းချက်တာဝန်များ၊ အခြားဝန်ကြီးဌာနမှ ပေးအပ်သော တာဝန်များနှင့် ဒေသဆိုင်ရာအစိုးရအဖွဲ့များမှ ပေးအပ်သော လုပ်ငန်းတာဝန်များကို ကျေပွန်စွာထမ်းဆောင်နေကြရသည်ဖြစ်ရာ ဒေသဆိုင်ရာ အချက်အလက်များပြုစုထားရှိခြင်းသည် များစွာအရေးပါလာပါသည်။ ဒေသ ဆိုင်ရာအချက်အလက်များပြုစု ခြင်းဖြင့်မိမိတို့၏ လုပ်ငန်းဆောင်ရွက်ရာတွင် အထောက်အကူပြုသကဲ့သို့ အကြီးအကဲများနယ်မြေသို့ ကွင်းဆင်းရာတွင် နယ်မြေ၏ အချက်အလက်များကို လွယ်ကူစွာသိရှိနိုင်မည်ဖြစ်ပါသည်။ ဤစာအုပ်သည် ဖရူဆိုမြို့နယ် ၏ဒေသဆိုင်ရာအချက်အလက်များ(၂၀၁၈ ခုနှစ် မတ်လကုန်ထိ အခြေအနေ)ကို သက်ဆိုင်ရာဌာနအသီးသီးမှပေးပို့ သောကိန်း ဂဏန်းများ နှင့်အညီ ပြုစုတင်ပြထားခြင်းဖြစ်ပါသည်။


ဒေသ သမိုင်းအကျဉ်း

၂။ ဖရူဆိုမြို့နယ်အမည်ခေါ်တွင်ခြင်းမရှိမီက –ကြယ်ဖိုးကြီး— နယ်အဖြစ် နှစ်ပေါင်းကြာမြင့်စွာတည်ရှိခဲ့ပါသည်။ကယားဘာသာစကားအရ –ကေးလျား— မြန်မာဘာသာ စကားအရ – ကျယ်ဝန်းသော နယ်မြေ —ဟု အဓိပ္ပါယ်သက်ရောက်ပါသည်။ ကေးလျားကြယ်ဖိုးကြီးနယ်သည်သာမန်တောင်သူလယ်သမား များမှ ပေါက်ဖွားလာသည့် ရှားရယ် (ခ) ကေးဖိုးဒူ မင်း(ကေးဖိုးဒူ စော်ဘွား) လက်ထက်မှစ၍မင်းအဆက်ဆက်စော်ဘွားများ အာဏာစွန့်လွှတ်သည့်( ၁၉၅၆ - ၆၀ )ခုနှစ်အထိ ထင်ရှားသောမြို့နယ်တစ်မြို့နယ် ဖြစ်ခဲ့ပါသည်။ ၁၉၆၂ခု တော်လှန်ရေးကောင်စီတက်လာပြီးနောက် လမ်းပန်းဆက်သွယ်ရေးအခက်အခဲ ကြောင့် အုပ်ချုပ်ရေးရုံးစိုက်ရာ ဒေသကိုကေးလျား‘ကြယ်ဖိုးကြီး’ရွာမှ ဖရူဆို (ခ) ညောင်ဇင်ရွာ ( ယခု ဖရူဆိုမြို့ ) သို့ ပြောင်းရွေ့ခဲ့ပါသည်။ဖရူဆိုခေါ်တွင် ခြင်းမှာမြို့၏ အနောက်တောင်ဘက်တွင်ဂူပေါက်ရှိသော တောင်နှင့် တောင် ကမ်းပါးကို အမှီသဟဲပြု၍ခေါ်တွင်ခြင်းဖြစ်ပါသည်။ ကယားဘာသာစကား ဖြစ်ပြီးအဓိပ္ပါယ်မှာ(ပရို-တန်ခိုးအာနုဘော်ဖော်ပြနိုင်သူ၊ဆို-တောင်)တန်ခိုးတော် တောင်မြို့ ဟုမြန်မာလို အဓိပ္ပါယ်ရပါသည်။ တော်လှန်ရေးကောင်စီမတက်မီ အထိ တိုက်နယ် (၆)နယ် (ဖရူဆို မြို့မ၊ မိုဆို၊ တော်ခူ၊ ဟိုယာ၊ ဝေဝါ၊ ကေကော) ဖြင့် အုပ်ချုပ်လာပြီး ၁၉၆၂ခု ပြောင်းလဲလာသည်မှစ၍ ရပ်ကွက်(၅ ) ရပ်ကွက်၊ ကျေးရွာအုပ်စု (၁၄)အုပ်စု၊ ကျေးရွာ(၁၁၅)ရွာခွဲ၍ အုပ်ချုပ်လာခဲ့ပါသည်။ ယခုတွင် ပြည်ထဲရေးဝန်ကြီးဌာန၏ (၁၇-၃-၂၀၁၆) ရက်စွဲပါအမိန့်ကြေငြာစာ အမှတ် (၈၀၁/၂၀၁၆)အရ ဒိုမာခိုကျေးရွာအား ပယ်ဖျက်ပြီးဖြစ်ပါ၍ (၁၁၄)ရွာ သာ ကျန်ရှိပါသည်။

အခန်း(၂)

ပထဝီဝင် အနေအထား


တည်နေရာနှင့် အကျယ်အဝန်း

၃။ ဖရူဆိုမြို့နယ်သည် မြောက်လတ္တီတွဒ်၁၉ ဒီဂရီ ၁၇မိနစ်နှင့် ၁၉ ဒီဂရီ ၅၈မိနစ်ကြား အရှေ့လောင်ဂျီတွဒ် ၉၆ ဒီဂရီ ၁၀ မိနစ်နှင့် ၉၆ ဒီဂရီ ၇၃မိနစ် အကြားတွင်တည်ရှိပါသည်။ အရှေ့မှအနောက်သို့ (၆၄ )မိုင်နှင့်တောင်မှ မြောက် သို့ (၇၈)မိုင် ရှည်လျားပါသည်။ ဧရိယာစတုရန်းမိုင်မှာ အောက်ပါအတိုင်း ဖြစ်ပါသည်-

စဉ် မြို့အမည် မြို့ဧရိယာ စတုရန်းမိုင် ကျေးရွာအုပ်စု ဧရိယာစတုရန်းမိုင် မြို့နယ်ဧရိယာ စတုရန်းမိုင်
ဖရူဆို ၀.၉၀ ၆၄၂.၀၁ ၆၄၂.၉၁


နယ်နိမိတ်

၄။ ဖရူဆိုမြို့နယ်၏ အရှေ့ဘက်တွင် ဒီးမော့ဆိုမြို့နယ်၊ ဘောလခဲ မြို့နယ်၊ တောင်ဘက်တွင်ဖာဆောင်းမြို့နယ်၊ အနောက်ဘက်တွင် ကရင် ပြည်နယ်၊ သံတောင်မြို့နယ်နှင့် ရှမ်းပြည်နယ်၊ ဖယ်ခုံမြို့နယ်၊ မြောက်ဘက် တွင် ဒီးမော့ဆိုမြို့နယ်တို့နှင့် နယ်နိမိတ်ထိစပ်လျက်ရှိပါသည်။


မြေမျက်နှာသွင်ပြင်

၅။ ဖရူဆိုမြို့နယ်သည် တောတောင်ထူထပ်ပြီးပင်လယ်ရေမျက်နှာပြင် အထက် (ပေ ၂၉၀၀ မှ ၆၀၀၀)ထိမြင့်မားသော တောင်ကုန်းပေါ်တွင် တည်ရှိပါသည်။ ထင်ရှားသော တောင်များမှာ ခေါသမောတောင်(၆၆၈၃)ပေ ဖြစ်ပါသည်။


ရေဆင်း

၆။ ဖရူဆိုမြို့နယ်တွင် မြစ်ချောင်းများနည်းပါးသည့် ဒေသတစ်ခုဖြစ်ပြီး မြစ်ချောင်းများသည် မြောက်မှ တောင်သို့စီးဆင်းလျက်ရှိပါသည်။ ထင်ရှား သောချောင်းမှာ ထူးချောင်းဖြစ်ပြီး ဟိုယာကျေးရွာအုပ်စုနှင့် သိုသီးဖိုကျေးရွာ အုပ်စုအနီးမှဖြတ်၍ ဘောလခဲမြို့နယ်ရှိ ပွန်ချောင်းသို့ စီးဆင်းပါသည်။


ပင်လယ်ရေမျက်နှာပြင်အထက်အမြင့်

၇။ ဖရူဆိုမြို့သည် ပင်လယ်ရေမျက်နှာပြင်အထက် ပျှမ်းမျှ အမြင့် (၂၉၈၂)ပေ အထက်တွင် တည်ရှိပါသည်။

 

၂၀၁၇ ခုနှစ်၊ ဧပြီလမှ ၂၀၁၈ ခုနှစ်၊ မတ်လအထိ သတင်းအချက်အလက်အပြည့်အစုံ ဖတ်ရှု့ရန်

၂၀၁၈ ခုနှစ်၊ ဧပြီလမှ ၂၀၁၈ ခုနှစ်၊ စက်တင်ဘာလအထိ သတင်းအချက်အလက် အပြည့်အစုံဖတ်ရှု့ရန်