လွိုင်ကော်မြို့နယ်ဒေသဆိုင်ရာအချက်အလက်များ

အခန်း(၁)

နိဒါန်းနှင့်ဒေသသမိုင်း

နိဒါန်း

၁။ အထွေထွေအုပ်ချုပ်ရေးဦးစီးဌာနသည် ပြည်ထဲရေးဝန်ကြီးဌာန အောက်ရှိ ဌာနတစ်ခုဖြစ်ပြီး တရားဥပဒေစိုးမိုးရေး၊ ရပ်ရွာအေးချမ်း သာယာရေး၊ ဒေသဖွံ့ဖြိုးရေးနှင့် ပြည်သူ့အကျိုးပြု ဆောင်ရွက်ရေးဟူသော ရည်မှန်းချက်တာဝန်များကို အောင်မြင်အောင် ဆောင်ရွက်လျှက်ရှိပါသည်။ အထွေထွေအုပ်ချုပ်ရေးဦးစီးဌာနတွင် တာဝန်ထမ်းဆောင်ကြသည့် အဆင့် ဆင့်သောအရာထမ်း၊ အမှုထမ်းများသည်ရုံးချုပ် အဆင့်မှ အောက်ခြေ ရပ်ကွက်/ ကျေးရွာအုပ်စုအဆင့်အထိ အထွေထွေအုပ်ချုပ်ရေး ဦးစီးဌာန ရုံးအသီးသီးတွင် တာဝန်ထမ်းဆောင်ကြရပြီး နိုင်ငံတော်အုပ်ချုပ်ရေး ယန္တရားချောမွေ့စွာ လည်ပတ်ရေးတွင်ပါဝင်ဆောင်ရွက်ခြင်း၊ ဝန်ကြီးဌာန၏ ရည်မှန်းချက်တာဝန်များ၊ အခြားဝန်ကြီးဌာနမှပေးအပ်သောတာ ဝန်များနှင့် ဒေသဆိုင်ရာအစိုးရ အဖွဲ့များမှ ပေးအပ်သော လုပ်ငန်းတာဝန်များကို ကျေပွန်စွာ ထမ်းဆောင်နေကြရသည် ဖြစ်ရာ ဒေသဆိုင်ရာအချက်အလက်များ ပြုစုထားရှိခြင်းသည် များစွာ အရေးပါလာပါသည်။ ဒေသဆိုင်ရာအချက် အလက်များပြုစုခြင်းဖြင့် မိမိတို့၏ လုပ်ငန်းဆောင်ရွက်ရာတွင် အထောက် အကူပြုသကဲ့သို အကြီးအကဲများ နယ်မြေသို့ ကွင်းဆင်းရာတွင် နယ်မြေ၏ အချက်အလက်များကို လွယ်ကူစွာ သိရှိနိုင်မည် ဖြစ်ပါသည်။ ဤစာအုပ် သည် လွိုင်ကော်မြို့နယ်၏ဒေသဆိုင်ရာ အချက်အလက်များ(၂၀၁၈ခုနှစ်၊ မတ်လ ကုန်ထိအခြေအနေ)ကို သက်ဆိုင်ရာ ဌာနအသီးသီးမှ ပေးပို့သော ကိန်းဂဏန်းများနှင့် အညီ ပြုစုတင်ပြထားခြင်းဖြစ်ပါသည်။


ဒေသသမိုင်းအကျဉ်း

၂။ မြန်မာသက္ကရာဇ် ၁၂၀၀ပြည့်နှစ်၊ ခရစ်သက္ကရာဇ် ၁၈၃၈-ခုနှစ်တွင် ဦးသီရိ ဦးဆောင်၍ သီရိဒေါရွာအဖြစ် စတင်တည်ထောင်ခဲ့ပါသည်။ ကယားဘာသာဖြင့် (ရွာ)ဟုအမည်ရပါသည်။ တောင်ကွဲတောင်၊ ရွှေတောင် အနီးတည်ထားသဖြင့်(လွိုင်ခေါ်)ဟု ရှမ်းဘာသာဖြင့် ခေါ်ဝေါ်ခဲ့ပါသည်။ 'လွိုင်'မှာတောင်၊'ခေါ်'မှာ တကွဲတပြားစီဟု အဓိပ္ပါယ်ရပါသည်။ လွိုင်ခေါ်မှ လွယ်ကော် - လွိုင်ကော်ဟူ၍ ဖြစ်ပေါ်လာပါသည်။ မြန်မာသက္ကရာဇ် ၁၂၅၀ခု၊ ကဆုန်လဆန်း(၁၁)ရက်၊ (၂၀-၄-၁၈၈၈) ရက်နေ့တွင် ကန္ဒရဝတီ စော်ဘွား စဝ်လဝီက လွိုင်ကော်မြို့ ဟော်နန်းကို စိုက်ထူခဲ့ပါသည်။ ၁၉၄၇-ခုနှစ်ထိ ကရင်နီ ပြည်နယ်အဖြစ် တည်ရှိပါသည်။ ၁၉၅၁-ခုနှစ်၊ ဖွဲ့စည်း အုပ်ချုပ်ပုံအခြေခံဥပဒေပြင်ဆင်ချက်အရ ကယားပြည်နယ်အဖြစ် ပြောင်းလဲ ခဲ့ပါသည်။ ကယားပြည်နယ်၏ မြို့တော်အဖြစ်လွိုင်ကော်မြို့ကိုသတ်မှတ် ခဲ့ပါသည်။ နှစ်စဉ် ဇန်နဝါရီလ (၁၅)ရက်နေ့ကို ကယားပြည်နယ်နေ့အဖြစ် စည်ကားသိုက်မြိုက်စွာကျင်းပလျက်ရှိပါသည်။ ပြည်ထဲရေးနှင့် သာသာနာ ရေးဝန်ကြီးဌာန၏ (၂၂-၂-၁၉၇၂)ရက် နေ့စွဲပါစာအမှတ်၊ ၁၀၅/၇/စိတ်(၁) ဖြင့် လွိုင်ကော်မြို့နယ်ကို ရပ်ကွက်(၁၃) ရပ်ကွက်၊ ကျေးရွာအုပ်စု(၁၂) အုပ်စု၊ကျေးရွာငယ်(၁၂၇)ရွာဖြင့်ဖွဲ့စည်းမိန့်ထုတ်ပြန်ခဲ့ပါသည်။ ယခုအခါ ပြည်ထဲရေးဝန်ကြီးဌာန၏ (၁၇-၃-၂၀၁၆) ရက်စွဲပါ အမိန့်ကြော်ငြာစာ အမှတ် (၈၀၁/၂၀၁၆) အနောင်ယား(က)ရပ်ကွက်မှ နာနတ်တော ရပ်ကွက် အဖြစ် ခွဲထွက်ခြင်း၊ ပန်ကန်းကျေးရွာအုပ်စုမှ နမ့်ဘော်ဝမ် ( က)၊ နမ့်ဘော်ဝမ်(ခ)၊ဧက(၅၀၀) ကျေးရွာများအား ရပ်ကွက်အဖြစ် တိုးချဲ့ ဖွဲ့စည်းခြင်း၊ ချိကယ်ကျေးရွာအုပ်စုမှ ထေးသမ၊နမ့်ကွတ်ကျေးရွာများအား ရပ်ကွက်အဖြစ်တိုးချဲ့ဖွဲ့စည်းခြင်း၊ လွိုင်လင်လေးကျေးရွာအုပ်စုမှ နန်းလွှာ ကျေးရွာ၊ တီးလုံကျေးရွာအုပ်စုမှ လုံပုကျေးရွာအား ပြည်ထဲရေး အမည် ပေါက်ကျေးရွာများအဖြစ် ဖွဲ့စည်းထည့်သွင်းခြင်း၊ လောပိတ ကျေးရွာအုပ်စု မှ ဂျပန်ဝန်း ကျေးရွာအား ပြည်ထဲရေးအမည်ပေါက်မှ ပယ်ဖျက်ပေးခဲ့ သဖြင့် လက်ရှိအချိန်တွင် လွိုင်ကော်မြို့နယ်၌ ရပ်ကွက် (၁၉)ရပ်ကွက်၊ ကျေးရွာအုပ်စု (၁၂)အုပ်စုနှင့် ကျေးရွာပေါင်း (၁၂၃)ရွာဖြင့် ဖွဲ့စည်းထား ရှိပါသည်။ တိုးချဲ့ ပြင်ဆင် ဖွဲ့စည်းခဲ့သည့် နာနတ်တော၊ နမ့်ဘော်ဝမ်(က)၊ နမ့်ဘော်ဝမ်(ခ)၊ဧက(၅၀၀)၊ ထေးသမ၊ နမ့်ကွတ် ရပ်ကွက်များအား ရပ်ကွက်များအဖြစ် ပြုပြင်ပြင်ဆင်ဖွဲ့စည်းပြီး ရပ်ကွက်အုပ်ချုပ်ရေးမှူး အားလုံးခန့်အပ် တာဝန်ပေးအပ်ထားပြီးဖြစ်ပါသည်။

အခန်း(၂)

ပထဝီဝင် အနေအထား


တည်နေရာ နှင့်အကျယ်အဝန်း

၃။ လွိုင်ကော်မြို့နယ်သည် ကယားပြည်နယ်၊ လွိုင်ကော်ခရိုင်တွင် ပါဝင်ပြီး ကယားပြည်နယ်၏မြို့တော်ဖြစ်ပါသည်။လွိုင်ကော်မြို့နယ်သည် မြောက်လတ္တီတွဒ် ၁၉ဒီဂရီ ၁၄ မိနစ်မှ ၂၀ဒီဂရီ ၅၉မိနစ်နှင့် အရှေ့ လောင်ဂျီတွဒ် ၉၇ ဒီဂရီ၀၇မိနစ်မှ ၉၇ဒီဂရီ၂၂မိနစ်ကြားတွင် တည်ရှိပါ သည်။ အကျယ်အဝန်းမှာ(၅၉၈.၀၆)စတုရန်းမိုင်၊ ဧရိယာ ဧက(၃၈၂၇၆၀) ဧက ကျယ်ဝန်းပါသည်။

စဉ် မြို့အမည် မြို့ဧရိယာ စတုရန်းမိုင်ကျေးရွာအုပ်စု ဧရိယာစတုရန်းမိုင် မြို့နယ်ဧရိယာ စတုရန်းမိုင်
လွိုင်ကော် ၁၀.၃ ၅၈၇.၃၀၉ ၅၉၈.၀၆
  မြို့နယ်ချုပ် ၁၀.၃ ၅၈၇.၃၀၉ ၅၉၈.၀၆


နယ်နိမိတ်

၄။ လွိုင်ကော်မြို့နယ်၏ အရှေ့ဘက်တွင် ရှားတောမြို့နယ်၊ အနောက် ဘက်တွင် ဒီးမော့ဆိုမြို့နယ်၊ တောင်ဘက်တွင် ဘောလခဲမြို့နယ်နှင့် မြောက်ဘက်တွင် ရှမ်းပြည်နယ်၊ ဖယ်ခုံမြို့နယ်၊ ဆီဆိုင်မြို့နယ်တို့နှင့် ထိစပ်လျှက်ရှိပါသည်။


မြေမျက်နှာသွင်ပြင်

၅။ တောတောင်နှင့် သစ်တောများပြားပြီး ‌မြေပြန့်လွင်ပြင် နည်းပါးပါသည်။ ထင်ရှားသော ချောင်းများမှာ ဘီလူးချောင်း၊ ပွန်ချောင်း တို့ဖြစ်ပြီး ထင်ရှားသော တောင်များမှာ သီရိမင်္ဂလာတောင်တော် (တောင်ကွဲ)၊ ရွှေတောင်၊ တောင်သုံးလုံး၊ မြကလပ်တောင်၊ ရွှေလက်ဝါးတောင်တို့ ဖြစ်ပါသည်။


ရေဆင်း

၆။ လွိုင်ကော်မြို့နယ်အတွင်း စီးဆင်းလျှက်ရှိသော ထင်ရှားသော မြစ်ချောင်းမှာ ဘီလူးချောင်းဖြစ်ပြီး အနောက်ဘက်မှ အရှေ့ဘက်သို့ စီးဆင်းလျှက်ရှိပါသည်။ ရေချိုရေ ဖြစ်ပြီး သောက်သုံးရေနှင့် စိုက်ပျိုးရေ အဖြစ် သုံးစွဲလျှက် ရှိပါသည်။


ပင်လယ်ရေမျက်နှာပြင်အထက်အမြင့်

၇။ လွိုင်ကော်မြို့နယ်သည် ပင်လယ်ရေမျက်နှာပြင်အထက် ပျှမ်းမျှ အမြင့် (၂၉၅၀)ပေ အထက်တွင် တည်ရှိပါသည်။

 

၂၀၁၇ ခုနှစ်၊ ဧပြီလမှ ၂၀၁၈ ခုနှစ်၊ မတ်လအထိ သတင်းအချက်အလက်အပြည့်အစုံ ဖတ်ရှု့ရန်

၂၀၁၈ ခုနှစ်၊ ဧပြီလမှ ၂၀၁၈ ခုနှစ်၊ စက်တင်ဘာလအထိ သတင်းအချက်အလက် အပြည့်အစုံဖတ်ရှု့ရန်